தீபாவளி ஸ்பெஷல்: சுட சுட நாட்டுக்கோழி பிரியாணி ருசிக்கலாம்....

 சிறுவர்கள் முதல் பெரியவர்கள் வரை விரும்பி சாப்பிடக் கூடிய உணவு வகைகளில் ஒன்று பிரியாணி.

அந்த வகையில் அனைவருக்கும் விருப்பமான சுட சுட நாட்டுக்கோழி பிரியாணி செய்வது குறித்து தெரிந்துக் கொள்வோம்.

தேவையான பொருட்கள்

• நாட்டுக்கோழி - முக்கால் கிலோ
• சீரகச்சம்பா அரிசி - அரை கிலோ
• பெரிய வெங்காயம் - 200 கிராம்
• சின்ன வெங்காயம் - 100 கிராம்
• தக்காளி - 200 கிராம்
• இஞ்சி - சிறிய துண்டு
• பூண்டு - 4 பற்கள் பச்சை
• மிளகாய் - 5
• கொத்தமல்லித் தழை -  2 கைப்பிடி
• புதினா -  ஒரு கைப்பிடி
• கெட்டித் தயிர் - கால் கப்
• மிளகாய் தூள் - ஒரு தேக்கரண்டி
• பிரியாணி மசாலா- 2 தேக்கரண்டி
• எலுமிச்சை - கால் மூடி
  
• ப்ரிஞ்சி இலை - 3
• எண்ணெய் - 4 தேக்கரண்டி
• உப்பு - தேவையான அளவு

தயாரிப்புமுறை

• முதலில் நாட்டுக்கோழியை நன்றாக சுத்தம் செய்து கொள்ளவும்.
• பெரிய வெங்காயம், தக்காளி இரண்டையும் நறுக்கிக் கொள்ளுங்கள்.
• சின்ன வெங்காயம், இஞ்சி, வெள்ளைப்பூண்டு அனைத்தையும் நன்றாக அரைத்து பேஸ்ட் மாதிரி ஆக்கிக்கொள்ளுங்கள்.
• அடி கனமான பெரிய பாத்திரத்தை அடுப்பில் வைத்து எண்ணெய் ஊற்றி ப்ரிஞ்சி இலை, பெரிய வெங்காயம் சேர்த்து வதக்கவும்.
• இதனுடன் இஞ்சி- பூண்டு பேஸ்ட் சேர்த்து வதக்கவும், இதனுடன் கொத்தமல்லி, புதினா இலையை சேர்த்து வதக்கிய பின்னர் தக்காளி, பச்சை மிளகாய், தயிர் சேர்க்கவும்.
• இதனுடன் மிளகாய் தூள், பிரியாணி மசாலா சேர்த்து நாட்டுக்கோழியை சேர்த்து கிளறிவிடவும், இதனுடன் சிறிதளவு தண்ணீர் சேர்த்து கோழி வேக விடவும்.

• முக்கால் வாசி வெந்தவுடன், அரிசியின் அளவை விட ஒன்றரை மடங்கு தண்ணீர் சேர்த்து கொதிக்கவிடவும்.
• நன்றாக கொதித்த பின்னர், அரிசியை போட்டு மூடி வைத்து வேகவிடவும், முக்கால் பாதி வெந்தவுடன் எலுமிச்சை சாறு சேர்த்து கிளறிவிடவும்.
• தண்ணீர் முழுவதுமாக வற்றிய பின்னர், பிரியாணியை தம் போட்டு கிளறி விட்டால் சுவையான நாட்டுக்கோழி பிரியாணி தயார்!!!

ALSO READ : தீபாவளி நல்வாழ்த்துக்கள்