கோவையில் கொரோனா தீவிரமாகியுள்ளதாக பரவும் ஆடியோவால் மக்கள் பீதி

கொரோனா நோய்த் தொற்று தீவிரமாகியுள்ளதாக கோவை அரசு ஆஸ்பத்திரியை சேர்ந்த டாக்டர் ஒருவர் பேசுவது போன்று சமூக வலைதளங்களில் குரல் பதிவு (ஆடியோ) வேகமாக பரவி வருகிறது.

கோவை:

தமிழகத்தில் கொரோனா நோய்த் தொற்று குறைந்திருந்த நிலையில் கடந்த 2 வாரங்களாக மீண்டும் நோய்த் தொற்று அதிகரிக்கத் தொடங்கியுள்ளது.

இந்நிலையில் கடந்த 2 நாட்களாக கோவையில் திடீரென கொரோனா நோய்த் தொற்று தீவிரமாகியுள்ளதாக கோவை அரசு ஆஸ்பத்திரியை சேர்ந்த டாக்டர் ஒருவர் பேசுவது போன்று சமூக வலைதளங்களில் குரல் பதிவு (ஆடியோ) வேகமாக பரவி வருகிறது.

அதில் கோவையில் ரெட் அலர்ட் அறிவிக்கப்பட்டுள்ளது. தினமும் 1,200 பேர் வரையில் கொரோனா நோய்த் தொற்று உறுதி செய்யப்படுகிறது. கோவையில் தற்போது 3-வது கொரோனா அலை தீவிரமாகியுள்ளது.

இதில் இருந்து மீள்வது மிகவும் கடினம். எனவே அனைவரும் கவனமுடன் இருக்க வேண்டும். குளிர்ச்சியான உணவுகளை தவிர்த்து, சூடான உணவுகளை எடுத்துக்கொள்ள வேண்டும். தேர்தலுக்கு பின்பு பொது முடக்கம் அறிவிப்பதற்கு வாய்ப்புள்ளது என அந்த குரல் பதிவில் தெரிவிக்கப்பட்டுள்ளது.

இது குறித்து அரசு ஆஸ்பத்திரி டீன் நிர்மலா கூறும்போது:-

குரல் பதிவில் பேசியிருப்பது அரசு ஆஸ்பத்திரி டாக்டரா என்பது குறித்து ஆய்வு செய்யப்படுகிறது. எங்கள் ஆஸ்பத்திரியைச் சேர்ந்த டாக்டராக இருந்தால் உரிய நடவடிக்கை எடுக்கப்படும் என்றார். இது குறித்து சுகாதாரத் துறை துணை இயக்குனர் ரமேஷ்குமார் கூறியதாவது:-

சமூக வலைதளங்களில் பரவும் குரல் பதிவில் உண்மையில்லை. அனைத்தும் தவறான தகவல். கோவையில் கொரோனா நோய்த் தொற்று கடந்த 2 வாரங்களாக சற்று உயர்ந்துள்ளது. கடந்த வாரங்களில் தினசரி சராசரி பாதிப்பு எண்ணிக்கை 40 முதல் 50 ஆக இருந்த நிலையில் தற்போது 50 முதல் 60 ஆக உயர்ந்துள்ளது.

மாநிலம் முழுவதும் சற்று உயர்ந்துள்ளது. இதனால் தான் மீண்டும் சோதனைச் சாவடிகளில் பரிசோதனை தீவிர நடவடிக்கைகள் மேற்கொள்ளப்பட்டு வருகின்றன.

இந்நிலையில் இது போன்ற தவறான தகவல்களை தெரிவித்து மக்களை அச்சப்படுத்த வேண்டாம். பொது மக்கள் பொது இடங்களில் முகக்கவசம் அணிந்து. சமூக இடைவெளியை கடைப்பிடித்தாலே கொரோனா நோய்த் தொற்று பரவலைக் கட்டுப்படுத்த முடியும்.

இவ்வாறு அவர் கூறினார்.

Also read : தமிழகத்தில் மீண்டும் ஊரடங்கா...? தலைமைச் செயலாளர் ராஜீவ் ரஞ்சன் அவசர ஆலோசனை