உலகுக்கு அதிக தடுப்பூசிகளை இந்தியா வழங்கியது - ஐ.நா.வில் இந்திய தூதர் தகவல்

கொரோனா வைரஸ் தொற்றுக்கு எதிரான போராட்டத்தில் உலகளவில் இந்தியா கைகொடுத்து வருகிறது.

நியூயார்க், 

கொரோனா வைரஸ் தொற்றுக்கு எதிரான போராட்டத்தில் உலகளவில் இந்தியா கைகொடுத்து வருகிறது. இங்கு உருவாக்கப்பட்டுள்ள கோவிஷீல்டு, கோவேக்சின் தடுப்பூசிகள் உலக நாடுகள் பலவற்றுக்கும் வழங்கப்படுகிறது. இதையொட்டி நியூயார்க்கில் ஐ.நா. பொதுச்சபை கூட்டத்தில் இந்திய துணைத்தூதர் கே.நாகராஜ் நாயுடு பேசினார்.

அப்போது அவர், “கொரோனா வைரஸ் சவால் தீர்க்கப்பட்டுள்ளது. ஆனாலும் கொரோனா தடுப்பூசிகள் கிடைக்கும் தன்மை, அணுகல், மலிவு விலை, வினியோகம் ஆகியவற்றை நாங்கள் உறுதி செய்கிறோம். உள்ளபடியே கூறுவதானால், எங்கள் சொந்த மக்களுக்கு போட்ட தடுப்பூசிகளின் எண்ணிக்கையை விட உலக அளவில் நாங்கள் வழங்கிய தடுப்பூசிகளின் எண்ணிக்கை அதிகம்” என குறிப்பிட்டார்.

மேலும் அவர் கூறும்போது, “இன்னும் 30 தடுப்பூசிகள் பரிசோதனையின் பல்வேறு கட்டங்களில் உள்ளன” எனவும் அவர் தெரிவித்தார்.

அத்துடன் இந்தியா 70-க்கும் மேற்பட்ட நாடுகளுக்கு தடுப்பூசிகளை ஏற்றுமதி செய்திருப்பதாகவும் அவர் குறிப்பிட்டார்.

Also read : மராட்டியத்தில் எச்சில் துப்பினால்-ரூ.500, முக கவசம் அணியாவிட்டால்-ரூ.1,000 அபராதம்