கிராமப்புறங்களின் ஒலிகளையும் வாசனையையும் பாதுகாக்கும் சட்டத்தை பிரான்ஸ் அரசு நிறைவேற்றியிருக்கிறது.
அழகான மலைக்கிராமம். தட்டி எழுப்பும் கொக்கரக்கோகோ சேவல் சத்தம். மாட்டு மணிகளின் ஓசை. காற்றில் அசையும் புளியமர இலைகளின் சிலிர்ப்பு, இவை அனைத்தையும் எங்கோ கேள்வி பட்டது போல இருக்கலாம். வேறு எங்கும் இல்லை, நம்மில் பலர் இவற்றை பாரதிராஜவின் படங்களில் பார்த்திருப்போம்.
வேலை சூழல் காரணமாக இன்று நகரங்களில் வசிக்கும் 90 சதவிகிதம் பேர் கிராம புறங்களில் இருந்து குடிபெயர்ந்தவர்களே.
நகரங்களில் வாழும் பலருக்கும் குருவிக்கூடு போல உள்ள அடுக்குமாடி குடியிருப்புகளில் அன்றாட வாழ்க்கை. அனுதினமும் நைல் நதி போல விரிந்திருக்கும் டிராபிக்கை கடந்து சென்று வேலை. பணி முடிந்து டிராபிக்குகளில் மாட்டிக்கொண்டு மறுபடியும் வீடு. பிறகு மீண்டும், அடுத்த நாள் இதே போல ரொட்டீன் வாழ்க்கை...
இப்படிப்பட்ட நகர வாழ்க்கையில் இருந்து மீள நினைத்தாலும், வாழ்க்கை சூழலால், மீள முடியாமல் தவிப்பவர்கள் தான் ஏராளம்.
ஆனால் கிராமப்புற வாழ்க்கையின் அன்றாட அம்சங்கள் வாழ்க்கையை அர்த்தப்படுத்துபவை. இன்றும் அமைதியும், நிம்மதியும் தேவை என்றால் கிராமத்தையே நாம் நாடுகிறோம்.
கிராமங்கள் தான் ஒவ்வொரு நாட்டின் முதுகெலும்பு என்பார்கள். இப்படிப்பட்ட கிராமங்களை பாதுகாக்க வேண்டும் என்று முடிவு செய்த பிரான்ஸ், கிராமப்புற வாழ்க்கையின் "உணர்ச்சி மிகுந்த பாரம்பரியத்தை" பாதுகாக்கும் சட்டத்தை நிறைவேற்றியுள்ளது.
நவீனமயமாகும் கிராமப்புறங்களில் நீதிமன்றத்தில் வரும் வழக்குகளில் பல ஒலி மாசு மற்றும் துப்புரவு தொடர்பானதாக காணப்பட்டுள்ளது. இதனைதொடர்ந்து, நீதிமன்ற வழக்குகளின் தொடர்ச்சியாக முன்மொழியப்பட்ட ஒரு மசோதாவுக்கு பிரான்ஸ் நாட்டு செனட்டர்கள் ஒப்புதல் அளித்தனர். அப்படி புகாரளிப்பவர்களுக்கு எதிராக கிராமவாசிகள் தொடர்ந்த வழக்கைத் தொடர்ந்து பிரான்ஸ் நாடாளுமன்றத்தில் கிராமப்புற வாழ்க்கையின் "உணர்ச்சி மிகுந்த பாரம்பரியத்தை" பாதுகாக்கும் சட்ட மசோதா கொண்டு வரப்பட்டது.
விரிவடையும் நகரமயமாக்கல் ஏற்படுத்தும் பல்வேறு சிக்கல்களுக்கும், பிரான்சின் விவசாய நிலங்களுக்கு ஏற்படும் அச்சுறுத்தலைத் தடுப்பதாக இந்த சட்டம் இருக்கும் என்றும் செனட்டர்கள் கூறுகின்றனர். இந்த சட்டம், கிராமப்புறங்களில் மண்ணின் மணத்துடன் பறவைகளில் ஒலிகள், டிராக்டர்கள் மற்றும் தேவாலய மணியோசைகள் என பல கிராமப்புற அடையாளங்களை தொலைக்காமல் இருக்கும் வகையில், பயனுள்ளதாக அமைந்துள்ளது.
என்னதான் நகரங்கள் நமக்கு வாழத்தகுந்த இடமாக இருந்தாலும், இதுப்போன்ற அனைத்து கிராமங்களும் பாதுகாக்க வேண்டும் என்பதே அனைவரின் எதிர்பார்ப்பு.
Comments
Post a Comment