உத்தர பிரதேசத்தில் முந்தி சென்ற வாகனங்கள் மோதி விபத்து; பலி எண்ணிக்கை 10 ஆக உயர்வு.

உத்தர பிரதேசத்தில் முந்தி செல்லும்பொழுது வாகனங்கள் ஒன்றுடன் ஒன்று மோதி ஏற்பட்ட விபத்தில் பலி எண்ணிக்கை 10 ஆக உயர்ந்துள்ளது.

லக்னோ,

உத்தர பிரதேசத்தின் மொராதாபாத் நகரில் குண்டர்கி காவல் நிலையத்திற்கு உட்பட்ட பகுதியில் மொராதாபாத் மற்றும் ஆக்ரா நெடுஞ்சாலையில் பேருந்து ஒன்று சென்று கொண்டிருந்தது.  இந்நிலையில், பேருந்தும், லாரி ஒன்றும் ஒன்றுடன் ஒன்று மோதி விபத்திற்குள்ளானது.

இந்த விபத்தில் 7 பேர் பலியானார்கள் என முதற்கட்ட தகவல் வெளியானது.  இதுபற்றி தகவல் அறிந்ததும் முதல் மந்திரி யோகி ஆதித்யநாத், காயமடைந்த நபர்களுக்கு போதிய மருத்துவ சிகிச்சை வழங்குவதற்கான நடவடிக்கைகளை எடுக்கும்படி அதிகாரிகளுக்கு உத்தரவிட்டார்.

இதேபோன்று உயிரிழந்தோரின் குடும்பத்தினருக்கு இழப்பீட்டு தொகையாக ரூ.2 லட்சம் மற்றும் காயமடைந்தவர்களுக்கு ரூ.50 ஆயிரம் வழங்கப்படும் எனவும் அவர் அறிவித்துள்ளார்.

இந்நிலையில், காவல் கண்காணிப்பாளர் கூறும்பொழுது, சாலை விபத்தில் பலியானோர் எண்ணிக்கை 10 ஆக உயர்ந்துள்ளது.  10 பேர் காயமடைந்து உள்ளனர்.  அவர்கள் சிகிச்சைக்காக கொண்டு செல்லப்பட்டு உள்ளனர் என கூறினார்.

இந்த சம்பவத்திற்கு பின் வந்த தடயவியல் குழு தடயங்களை சேகரித்து சென்றுள்ளனர்.  மீட்பு பணிகள் ஏறக்குறைய முடிவடைந்து விட்டன.  3 வாகனங்கள் ஒன்றுடன் ஒன்று மோதி கொண்டுள்ளன.

இந்த விபத்து பற்றி சம்பவம் நடந்தபொழுது அந்த பகுதியில் இருந்தவர்கள் கூறும்பொழுது, வாகனங்கள் ஒன்றை ஒன்று முந்தி சென்றன.  இதில் வாகனங்கள் மோதி விபத்து ஏற்பட்டு உள்ளது என தெரிவித்து உள்ளனர் என்று அவர் கூறியுள்ளார்.

Also read :  உலக அளவில் கொரோனா பரவலை தடுக்கும் நடவடிக்கையை சிறப்பாக கையாண்ட நாடுகளில் நியூசிலாந்துக்கு முதலிடம்.