முதல் அணுகுண்டு சோதனை..!

 1945-ம் ஆண்டு ஜூலை 16-ம் நாள் காலை 5.30 மணிக்கு உலகின் முதல் அணுகுண்டு நியூ மெக்ஸிகோவில் ஒரு காட்டுப் பகுதியில் நூறு அடி உயரமுள்ள எஃகு கோபுரத்தில் பொருத்தப்பட்டது.

அதை வெடிக்கச் செய்வதற்கான விசை சுமார் ஆறு மைல்களுக்கு அப்பாலுள்ள ஓரிடத்தில் வைக்கப்பட்டிருந்தது. ‘டிரினிடி’ எனப் பெயர் சூட்டப்பட்டிருந்த இந்த அணுகுண்டு பரிசோதனை அதிகாலை நேரத்தில் செயல்படுத்தப்பட்டது. அணுகுண்டு வெடித்தபோது பல சூரியன்கள் ஒரே சமயத்தில் சேர்ந்து பிரகாசிப்பது போன்ற வெளிச்சம் ஏற்பட்டது.

அந்த வெளிச்சம் சுமார் 250 மைல்களுக்கு அப்பாலும் தெரிந்தது. வெளிச்சத்தைப் பார்த்தவர்கள் சில மணி நேரம் குருடர்கள் போன்று பார்வை இழந்து தவித்தார்கள். பல வர்ணங்கள் கலந்த பயங்கரமான அழகான நெருப்புக் கோளம் ஒரு மைல் தூரம் வரை பூமியின் மீது கவிழ்ந்து கொண்டிருந்தது. பூமி ஆடியது.

குண்டு பொருத்தப்பட்டிருந்த எஃகு கோபுரம் உருகி ஆவியாகிவிட்டது. ஒரு வெண்ணிறப் புகை மண்டலம் நாய்க்குடை உருவத்தில் கிளம்பி எழுந்து உயரே 40 ஆயிரம் அடி தூரம் சென்றது. சுற்று வட்டார மக்கள் மிகப்பெரிய இடி இடித்து, மிகப் பெரிய மின்னல் வெட்டியது என்று நினைத்துக் கொண்டிருந்தார்கள். அதிகாரிகள் அணுகுண்டு ரகசியம் வெளியாவதை விரும்பவில்லை. அவர்கள் ஓர் அறிக்கை விடுத்து அதில், ‘வெடி மருந்து கிடங்கு ஒன்றில் தீ விபத்து ஏற்பட்டது’ என்று பொய்யான தகவலைத் தெரிவித்தனர்.

ALSO READ : இயற்கையின் 10 எல்லைக்கோடுகள்....