சீனா பற்றி தெரியாத சுவாரசிய தகவல்கள்.. அட இவ்வளவு மேட்டர் இருக்கா!

சீனா பற்றி பெரிதும் அறியப்படாத சுவாரசிய தகவல்கள்.

உலகிலேயே அதிக மக்கள் தொகை கொண்ட நாடு சீனா. தொன்மையான நாகரிகமும், கலாச்சாரமும் கொண்ட சீனா தற்போது உலகளவில் மிகப்பெரிய பொருளாதார பலம் படைத்த நாடுகளில் ஒன்றாகவும் இருக்கிறது. இதுபோக, சீன மக்கள் உலகம் முழுவதும் பரவி வாழ்கின்றனர். சீனா குறித்து பெரும்பாலும் அறியப்படாத சுவாரசிய தகவல்கள் ஒரு பார்வை.

குகைதான் வீடு

சீனாவில் சுமார் 3 கோடி பேர் குகைகளில் வசிக்கின்றனர். குறிப்பாக ஷான்ஷி மாகாணத்தில் கோடிக்கணக்கானோர் குகைகளில் வாழ்ந்து வருகின்றனர். ஏனெனில், அளவுக்கு அதிகமான செலவுகளை ஏழை மக்கள் சமாளிக்க முடியாததால் குகைகளிலேயே வீடு போல செட் அப் செய்து வசித்து வருகின்றனர்.

​சீன கண்டுபிடிப்புகள்

உலகத்துக்கு முன்பாகவே பல விஷயங்களை சீனர்கள் கண்டுபிடித்துவிட்டனர். இதில் மிக பிரபலமானது காகிதம். இதுபோக, காகித நாணயம், வெடிமருந்து, காம்பஸ் (திசைகாட்டி), பட்டு, மது நொதித்தல் ஆகியவற்றை சீனர்கள் கண்டுபிடித்தனர். மனித உடல் முழுக்க ரத்தத்தை இதயம்தான் பம்ப் செய்கிறது என்பதை 2ஆம் நூற்றாண்டிலேயே சீனர்கள் கண்டுபிடித்துவிட்டனர்.

​பணத்துக்கும் நகத்துக்கும் தொடர்பு

சீனாவில் பழங்காலத்தில் பணக்காரர்கள் கைவிரல் நகத்தை நீளமாக வளர்த்துள்ளனர். எவ்வளவுக்கு எவ்வளவு நகம் நீளமாக இருக்கிறதோ அதற்கு ஏற்ப செல்வம் அதிகம் என பொருள்.

உலகின் வேகமான போக்குவரத்து

விமானத்தை தவிர உலகிலேயே தரைவழியில் வேகமாக பயணிக்க சீன புல்லட் ரயில்களே சிறந்த வழி. சீனாவின் அதிவேக ரயில்களில் ஒவ்வொரு ஆண்டும் 144 கோடி பேர் பயணிக்கின்றனர். உலகின் மிக வேகமான ரயிலான ஷாங்காய் மாக்லெவ் மணிக்கு 302 மைல் வேகத்தில் பயணிக்கிறது. இந்த வேகத்தை காரிலோ, பஸ்ஸிலோ நினைத்துக்கூட பார்க்க முடியாது.

உயரமான கட்டிடங்கள்

சீனாவில் அண்ணாந்து பார்க்க வைக்கும் உயரமான கட்டிடங்கள் ஏராளம். 2025ஆம் ஆண்டுக்குள் சீனா 4000 கோடி சதுர மீட்டர் அளவில் புதிய உயரமான கட்டிடங்களை கட்டிமுடித்துவிடும். இது 10 நியூ யார்க் நகரங்களுக்கு சமம்.

​அடங்காத பிளேக் நோய்

சீனா பல வழிகளில் வளர்ச்சி அடைந்தாலும், இன்னும் பிளேக் நோயின் தாக்கத்தில் இருந்து முழுமையாக மீளவில்லை. இன்னும் அவ்வப்போது சில பகுதிகளில் பிளேக் நோய் தொற்று திடீரென பரவுகிறது.

​தினசரி போராட்டம்தான்

சீனாவில் தினமும் சராசரியாக 274 போராட்டங்கள் நடைபெறுவதாக கூறப்படுகிறது. ஆனால், சீன ஊடகங்களை அந்நாட்டு அரசு கடுமையாக தணிக்கை செய்வதால் பெரும்பாலான போராட்டங்கள் வெளியே தெரிவதில்லை.