2021-ம் ஆண்டில் 4 கிரகணங்கள் நிகழும் இந்தியாவில் 2 கிரகணங்கள் தெரியும்

 

2021-ம் ஆண்டில் 4 கிரகணங்கள் நிகழும், அவற்றில் 2 கிரகணங்கள் இந்தியாவில் தெரியும் என தகவல் வெளியாகி உள்ளது.

இந்தூர், 

மத்திய பிரதேச மாநிலம், உஜ்ஜயினியில் உள்ள ஜிவாஜி ஆய்வகத்தின் கண்காணிப்பாளர் டாக்டர் ராஜேந்திர பிரகாஷ் குப்த், செய்தி நிறுவனம் ஒன்றுக்கு நேற்று பேட்டி அளித்தார். அப்போது அவர் வெளியிட்ட தகவல்கள் வருமாறு:-

* 2021-ம் ஆண்டில் 4 கிரகணங்கள் நிகழும். தலா ஒரு பூரண சூரிய கிரகணமும், பூரண சந்திர கிரகணமும் ஏற்படும்.

* மே மாதம் 26-ந் தேதி சந்திரகிரகணம் நிகழும். இது மேற்கு வங்காளம், கடலோர ஒடிசா மற்றும் வட கிழக்கு மாநிலங்களில் தெரியும். சூரியனுக்கும், சந்திரனுக்கும் இடையே பூமி வருகிறபோது பூரண சந்திரகிரகணம் ஏற்படுகிறது.

* ஜூன் மாதம் 10-ந் தேதி வருடாந்திர சூரிய கிரகணம் நிகழும். அப்போது சூரியனுக்கும், பூமிக்கும் இடையே சந்திரன் வரும். இது 94.3 சதவீதம் சூரியனை மூடி, நெருப்பு வளையமாக காணப்படும். ஆனால் இந்தியாவில் இதை பார்க்க முடியாது.

* நவம்பர் 19-ந் தேதி பகுதி சந்திர கிரகணம் ஏற்படும். இதை அருணாசல பிரதேசம் மற்றும் அசாமின் சில பகுதிகளில் குறுகிய நேரத்துக்கு பார்க்க முடியும்.

* டிசம்பர் 4-ந் தேதி பூரண சூரிய கிரகணம் ஏற்படும். சந்திரனின் 97.9 சதவீதம், பூமியின் நிழலால் மூடப்பட்டிருக்கும். இந்த பூரண சூரிய கிரகணம் இந்தியாவில் தெரியாது.

இவ்வாறு அவர் தெரிவித்தார்.